SKETSA

MINTA CINTA MEWAH

oleh : Oesman Doblank

          KEPENGEEEEEEN banget, Dul Semplak ngebanting televisi meski kreditannya belon lunas. Pasalnya, Ijah Blangsak, bokinnye, nyang biasa nonton opera sabun colek, waktu diajak nonton berita, kayak kesima. 

            Bukannye nyebut amit amit jabang bayi, eh terkesimanye malah kagum sama ulah koruptor nyang nyuci duit hasil korup dengan cara ngasih hadiah barang dan mobil mewah ke beberapa cewek kece yang konon katanya artis top dan selebriti setengah populer.

             "Mestinye, abang tuh niru die. Cewek nyang belon sah jadi bininye aje, dikasih mobil mewah sama barang mewah. Bokinnye pasti dihadiahin kapal pesiar mewah," kate Ijah.

        Dul Semplak pikir, cuma komen sepintas lantas lupa sama soal kemewahan. Nggak taunye, Ijah nuntut ke Dul Semplak dan sambil ngerengek die minta dibeliin nyang mewah mewah tapi bukan rumah gedek nyang lokasinya mewah (mepet kesawah)

               " Waktu minta segale nyang mewah,lu mikir ape kagak si Jah?" Tanya Dul Semplak, nyang bukannye marah tapi malah kasian sama bokinnye. Bukan lantaran nggak bakalan sanggup ngebeliin. Tapi, kasihan lantaran Ijah jadi mendadak kagak tau diri. 

                Udeh tau punya laki nyang statusnye cuma buruh, dan gaji per bulan cuma cukup buat pas makan doang. Eh, bokinnye nyang biasenye kagak macem macem mendadak berobah.

                  "Pasti mikir, bang,"kata Ijah.

                "Soalnye," Ijah lanjutin omongannya

              " Tuh orang nyang becandain sapi, kan juga lelaki.Nah, abang juga, kan lelaki.Kalo die bisa, abang juga mesti sanggup," tegas Ijah, sambil ngingetin kalo lakinye bisa ngedeketin bang Jebleh, nyang punya sapi sepuluh ekor dan bisa diajak kerja sama ngurus soal persapian supaya bisa menghasilkan mobil dan barang mewah laennye.

                 " Usul lu bukan nggak bagus, Jah. Malah jenius.Cuman, gue mana punya kesempetan dapetin job nyang kayak gitu. Gue tuh cuman buruh pabrik, Jah. Bagus aje gue kerja di pabrik dangdang dan boss gue nggak praktekin kerja paksa. Coba kalo bos gue nyontoh kelakuan boss pabrik wajan, pasti gue disikse setiap hari," kate Dul Semplak, ngejelasin supaya Ijah jangan macem macem, sebab kalo Ijah neka neko ujung ujungnye ribet.

           " Bilang aje abang nggak mau nyenengin bini,"sentak Ijah nyang langsung ngambek,

           "Lo ngomong jangan asal ngejeblak, dong. Pemilu masih setaon lagi, udeh ngomong macem macem," kate Dul Semplak nyang berharap bokinnye sadar lantaran kagak bakal sanggup menuhin kemauan Ijah nyang mendadak berkelas lantaran biasa naik ojek jadi kepingin naik mobil mewah

          " Bang..." Kate Ijah nyang masih tetap keliatan kagak senang

          "Sekarang gini aje deh. Abang sanggup nggak menuhin permintaan aye"

      Tanpa pikir panjang, Dul Semplak langsung nyaut. Bukan cuma bilang kagak sanggup. Tapi sampai ajal dateng menyapa, juga nggak bakalan bisa menuhin permintaan Ijah

            " Nah, kalau abang gak sanggup, kasih Ijah kemewahan yang laen." kate Ijah.

            Dul Semplak bukan seneng tapi bingung. Soalnye, kalo Ijah minta kapal terbang super mewah, bakalan makin berabe. Bisa bikin Dul stress.

             " Jah.. kemewahan ape lagi sih? Lu jangan mikir gue sanggup, Jah?" Dul jadi memelas

             Tapi setelah Ijah ngejelasin die minta kemewahan cinta dan kalo disanggupin Dul Semplak nggak boleh kawin maning, sang suami jadi narik nafas selega leganya. Lebih lega dari Gelora Bung Karno, lapangan nyepak nyepak bola nyang kalo PSSI maen lawan tim luar negeri lebih sering kalah timbang menang.

           " Abang sanggup, kan?" Tanya bokinnye nyang tetep cembetut lantaran lakinye belum ngejawab dengan teges.

             " Kalo itu sih, gue sanggup, Jah," sahut Dul Semplak, kurang begitu ikhlas lantaran die lagi ngincer jande demplon nyang ditinggal minggat lakinye lantaran matre banget.

                 Cuma, akhirnye Dul Semplak rela ngebatalin niat ngudak ngudak sang janda, sebab, biar cakep banget tapi kalo matre, kagak bakalan setimpal sama penghasilannye.

<script type="text/javascript">

  var _gaq = _gaq || [];
  _gaq.push(['_setAccount', 'UA-41008897-1']);
  _gaq.push(['_setDomainName', 'sketsadanpantun.blogspot.com']);
  _gaq.push(['_setAllowLinker', true]);
  _gaq.push(['_trackPageview']);

  (function() {
    var ga = document.createElement('script'); ga.type = 'text/javascript'; ga.async = true;
    ga.src = ('https:' == document.location.protocol ? 'https://' : 'http://') + 'stats.g.doubleclick.net/dc.js';
    var s = document.getElementsByTagName('script')[0]; s.parentNode.insertBefore(ga, s);
  })();

</script>